ياللي سألتني عن الحب

الله احكيلي على الحب وقولي برك وين نلقاه راح نحاول باش نجاوب كيفاش انا نشوف معناه ودير في بالك هذا الحب ماراكش وحدك حاصل معاه شحال من واحد راه يتعذب والحل ديالو مازال ملقاه مايفدوش معاه تجارب ما يفيدو ملك ولا جاه شحال من سلطان عشى مذبذب سمح في ملكو وراح معاه شحال من بيت عشى رايب دخل فرق ناسو وخلاه وحصرا شحال من واحد هرب وخلى ولادو يبكو موراه شحال من شاب شحال من شايب شحال من واحد الحب عماه لحق حتى ولا يضرب ولادو ايماه يالي سالتني عن الحب على ما تضن والعلم لله قلبك هو لي راه مخرب وماراكش عارف حتى وين راه دير في بالك ذاك الحب الي يهرب وتجري موراه ولما تجري انت تهرب عمرك ما راح تتلاقى معاه على خاطر هذاك لعب مديور للي يتبع هواه ما تنال منو غير التعب ديرو كيما خيالك وانساه فرغ قلبك وعاود رتب وخلي عقلك يخدم معاه وقبل ما تحب لازم تحسب باش كي تمدو تمدو لمولاه هيا نبداو من أول حب....... أول حب هو الله اللي عطاك هذاك القلب اللي راك تحوس باش تملاه وبعدو يجي ثاني حب هوحبيبنا وحبيب الله عليه الصلاة والسلام تعب باش صفى قلبك اونقاه حبو عليا وعليك واجب سعدو الواحد اللي بغاه ومن بعدو يجي ثالث حب انو الواحد يحب يماه تسع شهر وهو يتقلب وهي مسكينة تتقلب معاه سنين وسنين وهي تتعذب وين يطيح يلقاها حداه حتى نهار يولي شايب يبقى طفل في عيون يماه ومن بعدها يجي رابع حب انو الواحد يحب باباه لانو خرج من بين الصلب والترائب اللي جواه شحال شقى وشحال تعذب باش كبرو باش رباه ومن بعدو يجي خامس حب هو الشريك اللي تعيش معاه دير في بالك تتحاسب نصف الدين هو تلقاه تعيش معاه تنجب طفل صغير لعقايب تلقاه وهذاك الطفل سادس حب متحس ولد دون سواه سبعة داعب وسبعة اتعب وسبعة صاحب دور معاه ومن بعد يجي سابع حب من رحم واحد انت وياه خوك خوك لايغرك صاحب حتى الصاحب في الشدة تلقاه وهذاك الصاحب ثامن حب تتقاسمو كل شي انت وياه وتاسع حب هما الاقارب الرحم ديالك ما تنساه ومن باعد يجي عاشر حب جارك اللي تسكن حداه المريض اللي راه يتعذب دقيقة واحدة اقسمها معاه صلي عليه اذا كان تحب ربي سبحانو ثم تلقاه او اليتيم اللي فقد الاب ولا حتى فقد يماه امسحلو راسو ابدا تحسب في كل شعرة اجر تلقاه والفقير اللي ما كسب واللي ما لحقش قوت عشاه واش راك تاكل واش راك تشرب؟ يالوكان خبزة اقسمها معاه ومن بعدهم تقدر تحب كل مومن في طريقك تلقاه لانو ربي سبحانو كتب المومنين خاوة في الله يالي سألتني على الحب بالنسبة ليا هذا معناه